شد الحزام

و انا بقرأ كلمات اغنيه شد الحزام للشيخ سيد درويش
حسيت انه فعلا بجد شيخ لأ و ولي من اولياء الله الصالحين
لأنه قدر يتنبأ بكلماته الحاله اللي بنعشها دلوقتي
و قلت اكيد جاله هاتف في المنام و قاله يا سيد يابني
بعد ميت سنه من دلوقتي هيجي خلق مش هيلاقوا حتى ياكلوا
و شاف في منامه منظر طابور العيش و اطفال الشوارع حتى الطلبه الغلابه اللي زينا


طبعا بعد ما فقت من الخيلات دي
قلت يااااااه معقوله متغيرناش من ميت سنه معقوله حالنا هو هواه بل ممكن يكون اسوأ كمان
معقوله في ميت سنه اتغيرت خريطه العالم
دول كبرت و دول انهارت
و احنا زي محنا متغيرناش في اي حاجه
يمكن نكون قلعنا الطرابيش
لكن فكرنا متغيرش كتير
حالتنا الاجتماعيه تتحول من سئ الى اسوأ
و المصري هو هو مهما تغير الزمان

-:اسيبكوا دلوقتي مع كلمات الاغنيه

شــــد الحــزام على وسطك غيره ما يفيدك

لابـــــد عن يــــوم برضــه ويعـــدلها ســــــيدك

وان كان شيل الحمول على ضهرك يكيدك

أهــــــون عليــــك يا حـــــر من مــدة إيـــــــدك

ما تيالله بيـــنا انت ويـــــــاه

ونســــتعان ع الشـــــــــقا بالله

واهو اللى فيه القسمة طلنـاه

واللى مافيهشى ان شالله ما جاه

ما دام بتلقى عيش وغمـوس

يهمـــك ايـــه تفضل موحــوس

ماتحـط راســـك بين الروس

لا تقوللى لا خيــار ولا فاقـوس

شــــد الحزام
ح اقـــولك ايه واعيـــد لك ايه كله له آخــر

دى وكســة جامدة وجت على عينك ياتاجر

يا وكســتك دلـــوقت لا وارد ولا صــــادر

يحلـــــــها ألفيـــــن حـــلاّل ربـك قـــــــادر

قوللى فى عرض النبى يا حسين

رايحين نلاقيها منين ومنيـن

والإش متجــــــوز اتنيــــــــــــن

يا دنيا روقى جتك البيـــــــن

عمــر البخيل يفضل منحـــــوس

لو علقوا على بابه فانــــوس

فلـــوس دى إيه سكتر يا جاموس

هى السعادة فى غنى النفوس

شــــد الحزام
يالله بنا يالله نلحق لاكسبريس اهـو ع الرصيف

وادى احنا يا دوبك لسه ماعملناش بحق رغيف

كل المحطـات قبــــلى وبحـــرى بقت لماليـــف

يتـوب عليـنا من دى العيشــة يا لطيف يا لطيف

ما قطعوا لنا التليفونــــات

وعطلوا التلغرافـــــــــــات

عمركش سمعت الدلنجات

بيسافروا لها بالباسبورتات

غلب حمار اللى له حما ر

يحمــله لك ست انفــــــــار

واهو السفر فى الأيام دى

صار ع البهايم ليل ونهــار
قرب شيــّـلنى شيّـــل

لا تقوللى كتيـر وقليّــل

لا تقوللى كتير وقليل

عمر الشـدة ما تطـــوّل

عمر الشدة ما تطـوّل

بكرة نهيص زى الأول

هيلا هيلا هيلة هــيلة

هيلا هيلا هيلة هـــــيلة